Están as noveliñas de vaqueiros. Eses clásicos libros finiños da colección ESTEFANÍA. Están os westerns do cine, que chegaron a nós excelentemente dobrados ao galego. E por suposto, están os westerns modernos. Todos teñen elementos comúns: hai certa violencia, a paisaxe ten un papel fundamental, as vilas son pequenas, o epicentro é a taberna, despútanse o poder, o orgullo e o territorio, as bandas sonoras son épicas, protagonízanos personaxes rurais que andan co gando e moitas veces ten peso o humor negro. Ademais todos acontecen no oeste. No lonxano oeste. Mais Vaites, rapariga! vén propoñer historias dun achegado oeste. Concretamente nor-oeste. O noso. Con historias que conteñen exactamente os mesmos elementos que os dos westerns ata o de agora coñecidos, dialogando directamente coa música. Unha comedia negra contada por Carmen “Lingua afiada” Conde e cantada por Su Garrido “Guitarra Lenta” Pombo. Dúas mulleres man a man na praza da vila, que van levar con elas a cada escenario. Narración oral e música ao vivo no novo western de Tarabela Creativa.